Pesta Gua Fairy Bau patut digaga nyadi produk dagang temuai

KELAI BEJADI: Dawos mangkung tawak simbolik bejadi Pesta Gua Fairy bau kemari. Bela dipeda Miroh (kiba) enggau (ari kanan) Inting enggau Monday.

BAU: Sapit Menteri Kuasa, Teknologi Gadung enggau Ai Dato Sri Dr James Dawos dekaka Pesta Gua Fairy Bau mandangka main asal bansa Bidayuh lalu nyadi sebengkah produk dagang temuai.

Bejaku rambau bejadi Pesta Gua Fairy ke-6 kemari, main asal nya ku Dawos patut dipegulai enggau eko-dagang temuai ke bekait enggau produk pengereja asal tauka utai ke bisi dalam gua, lalu pengawa nya dikearap ulih ngenataika pemisi belanja ngagai peranak ke diau ngelingi.

“Ba industri dagang temuai, kitai meseti berundingka pekara ti tau mai penguntung ekonomi ngagai peranak ke diau ngelingi.

“Ditu (Gua Fairy) kitai meseti nyendia produk ke bekait enggau main asal Bidayuh lalu dipegulai enggau produk eko-dagang temuai ke dikemisi ngelingi gua.

“Peranak ke diau ditu ulih bejualka pemakai sereta utai bukai tang pekara nya bedau mega chukup enti nadai orang datai meli.

“Ketegal nya kitai patut nemu bagi bulan kitai patut ngaga pesta lalu ulih matak temuai ari menua luar datai,” ku iya.

Dawos ke mega Kaban Parlimen (MP) Puncak Borneo madahka penerang sentang pekara nya ulih dipinta ari Opis Dagang Temuai Malaysia.

Kelimpah ari nya, Dawos mega ngarap pengawa ngemansang Gua Fairy ulih dikelengkas ketegal projek pemansang nya udah dikemendar.

“Aku nemu enggau silik kandang ngelingi Gua Fairy lalu aku udah mega ngemendar projek pemansang ditu bedau lama suba, ungkup pemaik peranak di Krokong enggau Serembu.

“Nya mih kebuah aku ngemendar projek lalu tanggungpengawa nya udah diberi ngagai Opis Kampung Sarawak ti nyerahka tanggungpengawa nya ngagai Sarawak Forestry Corporation (SFC).

“Nyentuk ngagai diatu, projek pemansang lalu bedau dipungkal ke alai aku pan udah dipindah ngagai opis menteri bukai pengudah ba Opis Menteri Dagang Temuai,” ku iya.

Pesta Gua Fairy diatur 3 hari berunggu berengkah 1 nyentuk 3 Julai 2016 ke alai mayuh bengkah program bisi disedia ngagai temuai ke datai.

Entara sekeda program iya nya lumba rayat baka ke pekit nyumpit enggau kayak, pengawa bejual pemakai enggau panggau pemerindang.

Bela datai ADUN Serembu Miro Semuh, Chairman Pengatur Pesta Leftenan Kolonel (B) Monday Juhit, Pemesai pelilih Bau Inting Nyami enggau Residen Serian Dahim Nadot.

Mukah Pages sharing local news with BorneoPost Online | Borneo , Malaysia, Sarawak Daily News http://ift.tt/299Zl87