PRS ngerami pemujur PRN11 sereta ngintu Mantar Gawai

SELAMAT GAWAI DAYAK: Masing (bediri lima ari kanan) ngerami pemujur menang semua 11 penuduk begulai enggau 10 ADUN PRS enggau kaban parti ke bukai.

KUCHING: Parti Rakyat Sarawak (PRS) malam ensanus ngerami pemujur menang ba semua 11 penuduk rambau Pengawa Bepilih Besai Nengeri Ke-11 (PRN11) kena 7 Mei ke udah.

Pengerami disegulai enggau pengawa ngintu Mantar Gawai ke diatur ba Palan Aum Borneo Kuching (BCCK) ke digulu lebih 2,000 iku kaban enggau penyukung PRS.

Presiden PRS Tan Sri James Masing ba jaku bejadi pengerami enggau gaga madah PRS udah dua kali teulih pemujur menang ba semua penuduk dalam timpuh dua taun setengah.

Keterubah ku iya, PRS menang semua enam penuduk parlimen rambau Pengawa Bepilih Besai 2013 (PRU13).

Kedua PRS sekali agi teulihka pemujur menang semua 11 penuduk nyengkaum iya empu ke bediri di sitak Baleh.

“Ajar aku ngagai semua pengari rayat PRS ke udah dipilih, keterubah anang enda nyaut kangau telefon enti enda tinduk.

“Ajar aku ti kedua, laban semua bela udah bebini, tentuka nuan sereta bini nuan bekereja dalam seiti tim.

“Lalu ajar ti ketiga, tentuka diri empu ngembuan ulah ke lurus sereta anang bula laban dalam timpuh lima taun tu kita dipinta mutarka semua penanggul ke ditapi pengundi (rayat),” ku iya ke mega nyadi Sapit Kepala Menteri.

Kelimpah Masing ke menang di Baleh, sepuluh agi pengari rayat PRS ke udah dipilih iya nya Datuk John Sikie Tayai (Kakus), Datuk Mong Dagang (Bukit Begunan), Liwan Lagang (Belaga), Malcolm Mussen Lamoh (Batang Ai), Snowdan Lawan (Balai Ringin), Alexander Vincent (Ngemah), Wilson Nyabong (Pelagus), Chukpai Ugon (Murum), Majang Renggi (Samalaju) enggau Christopher Gira (Tamin).

Ba pengerami nya, Masing ke mega Menteri Pemansang Infrastruktur enggau Pengangkut meri jaku puji ngagai tiga iku pengari rayat PRS, Malcolm, Sikie enggau Liwan ke udah dichiri nyadi Menteri Muda.

Jaku puji mega dikenatai ngagai Mong taja nadai agi nyadi Menteri Muda tang tanggungpengawa iya ke nyadi pengari rayat di Bukit Begunan mengkang dipejalai.

Basa enggau terima kasih mega diberi Masing ngagai semua pengundi PRS ti udah nentuka parti teulihka pemujur menang ba semua 11 penuduk lalu nentuka Barisan Nasional (BN) menang besai.

Bela datai Sapit Presiden PRS Datuk Joseph Entulu Belaun, Sekretari Besai PRS Datuk Wilfred Nissom, Ketuai Orang Indu PRS Dato Sri Doris Brodie, Kaban Parlimen (MP) Datuk Joseph Salang Gandum (Julau), Masir Kujat (Sri Aman), Datuk Wilson Ugak (Hulu Rejang) enggau Datuk William Nyalau (Lubok Antu).