Sarawak meseti nyikap diri napi Ekonomi Digital

SIBU: Sarawak meseti nyikap diri enggau silik ba atur nguingka singkang nengeri tu ngagai nengeri bepelasarka Ekonomi Digital nitihka ubah dunya ti bepanggai ba teknologi pemadah enggau dagang dunya nadai beantara.

Menteri Dagang Antarabansa enggau E-Dagang Dato Sri Wong Soon Koh madah, tu nejuka nengeri Sarawak deka chakah agi ngatur macham bengkah program dikena ngembing rayat ngemujurka pekara nya.

“Ketegal nya kitai deka sereta udah ngatur program bekaul enggau Digital Ekonomi seraya nyikap diri deka bekaul enggau orang nengah E-Dagang betikas dunya.

“Pia mega kitai udah kelimpah deka nemuai baru ngagai menua China laban deka nambahka agi penemu dikena nyediaka diri bejadika nengeri tu nyadi nengeri Ekonomi Digital,” pia ku iya madah.

Iya mantaika jaku tu maya Pengerami Bejadi enggau Nutup Wokshop Digital Marketing enggau Management Skills ke diatur Opis Menteri Dagang Antarabansa enggau E-Dagang berengkah 30-31 Oktober ba RH Hotel ditu, kemari.

Pengawa tu bela digulu Sekretari Mendam opis menteri nya Kameri Affandi enggau Pemangku Residen Sibu Wong Hee Sieng.

Wong ti mega Kaban Kunsil Nengeri (ADUN) Bawang Assan madah, saup ari macham bengkah ejensi lebih agi baka ari ejensi perintah besai beguna bendar ba pengawa meri tauka ngatur kus ungkup orang dagang nengeri tu nambahka penemu sida sereta nyikap sida enggau pengelebih ba dagang ‘on-line’ tauka E-Dagang.

Ku iya, rayat ditu enda ulih ngenggaika nengeri tu agi tinggal ba belakang ba pekara nya enti dibida enggau menua bukai.

“Nya alai, perintah nengeri udah ngungkupka urung RM1 billion dikena ngemansangka infrastruktur teknologi pemadah ngemujurka Digital Ekonomi enggau E-Dagang ditu,” ku iya madah baru.

Iya madah, perintah nengeri betuaika Kepala Menteri endang udah besedia sereta ransing ngembing nengeri tu bejadika pekara nya ketegal ti enda ulih nyeliahka diri besemekih seririh peminta enggau ubah dunya ngemeratka dagang bepelasar internet.

“Baka ke ditemu semua kitai, kitai meseti sikar taja kitai nemu bisi sekeda empai besedia napi ubah tu tang ngarapka rebak baru chakah sereta ransing ngaul diri enggau pengawa E-Dagang.

“Kebuah pia, menua baka China, Amerika, India sereta ke bukai endang udah mansang ba ubah dunya tu ti deka ditunda menua bukai dudi hari ila,” pia ku iya madah.-UtusanBorneo

✍ Sumber Pautan : ☕ SARAWAKIANA

Kredit kepada pemilik laman asal dan sekira berminat untuk meneruskan bacaan sila klik link atau copy paste ke web server : http://ift.tt/2z5XWQr

(✿◠‿◠)✌ Mukah Pages : Pautan Viral Media Sensasi Tanpa Henti. Memuat-naik beraneka jenis artikel menarik setiap detik tanpa henti dari pelbagai sumber. Selamat membaca dan jangan lupa untuk 👍 Like & 💕 Share di media sosial anda!